रसुवा बाढीमा १४ सय ७३ जनाको उद्धार, २ हजार बढी अझै बेपत्ता, मृतकको संख्या ५५३

रासंसा/काठमाण्डौ, भाद्र १३,

मुलुकमा रसुवास्थित भोटेकोशी नदीमा गत बुधबार बिहान आएको विनाशकारी बाढीका कारण मृत्यु हुनेको संख्या ५५३ पुगेको छ। प्रहरी प्रधान कार्यालय नक्सालका अनुसार विभिन्न जिल्लाबाट शुक्रबार साँझसम्म ५५३ जनाको शव फेला परेको हो। नेपाल प्रहरीका प्रवक्ता एवं प्रहरी नायब महानिरीक्षक अविनारायण काफ्लेका अनुसार बाढी प्रभावित क्षेत्रहरूबाट हालसम्म १ हजार ४७३ जनाको जीवितै उद्धार गरिएको छ। सबैभन्दा बढी चितवनमा २२२ र नवलपरासी पूर्वमा १३४ जनाको शव भेटिएको छ। यस्तै धादिङमा ४०, नुवाकोटमा ३८, तनहुँमा ३१, नवलपरासी पश्चिममा २८, रसुवामा १३ र गोरखामा ४७ जनाको शव फेला परेको प्रहरीले जनाएको छ। बाढीका कारण सुरक्षाकर्मी र निजामती कर्मचारीसमेत ठूलो संख्यामा बेपत्ता भएका छन्। हालसम्म नेपाली सेनाका ४४, नेपाल प्रहरीका २७ र सशस्त्र प्रहरी बलका १३ जना तथा भन्सार र अध्यागमन कार्यालयका कर्मचारी सम्पर्कविहीन छन्।उद्धार गरिएकामध्ये नुवाकोटबाट ८९८, रसुवाबाट ५७२ र धादिङबाट ३ जना रहेका छन्। घाइतेहरूको स्थानीय स्वास्थ्य संस्था तथा काठमाडौँका विभिन्न अस्पतालमा उपचार भइरहेको छ। हालसम्म ९७ जना उपचाररत तथा उपचारपछि डिस्चार्ज भइसकेका छन्। सर्वसाधारणसहित कुल २ हजार ३८१ जना अझै बेपत्ता रहेको र उनीहरूको खोजी कार्य तीव्र पारिएको प्रहरीले जनाएको छ। नेपाली सेना, नेपाल प्रहरी र सशस्त्र प्रहरी बलको संयुक्त टोली प्रभावित तथा सम्भावित क्षेत्रमा खोजी र उद्धारमा निरन्तर खटिरहेको छ।