तनहुँमा सवारी दुर्घटना न्यूनीकरण गर्न दैनिक चालक सचेतना अभियान तीव्र
अन्जनराज न्यौपाने गण्डकी प्रदेश
तनहुँ समाचार
तनहुँ,
— पृथ्वी राजमार्गअन्तर्गत मुग्लिनदेखि कोत्रीसम्मको सडकखण्डमा दिनप्रतिदिन बढ्दै गएको सवारी दुर्घटनालाई मध्यनजर गर्दै नेपाल प्रहरी र जिल्ला ट्राफिक प्रहरी कार्यालय तनहुँले सचेतनामूलक अभियानलाई तिब्रता दिएका छन्। राजमार्गमा हुने मानवीय क्षति तथा दुर्घटना न्यूनीकरण गर्ने उद्देश्यले प्रहरीले चालक तथा यात्रुहरूलाई लक्षित गरी दैनिक रूपमा विशेष सचेतना कार्यक्रमहरू आयोजना गर्दै आएको छ।
बढ्दो यातायातको चाप, तीव्र गति र ट्राफिक नियमको पालना नगर्ने प्रवृत्तिका कारण यस खण्डमा दुर्घटनाको जोखिम उच्च रहँदै आएको छ। यसलाई समयमै नियन्त्रण गर्न जिल्ला प्रहरी कार्यालय तनहुँको सक्रियतामा सञ्चालन गरिएको यस अभियानअन्तर्गत सवारी चालकहरूलाई लक्षित गरी विभिन्न कार्यक्रमहरू भइरहेका छन्।
अभियानका प्रमुख गतिविधिहरू:
मार्गमा विशेष काउन्सिलिङ: यात्रा सुरु गर्नुअघि चालकहरूलाई गाडीको अवस्था, टायर, ब्रेक तथा कागजातहरूको अनिवार्य जाँच गर्न आग्रह गरिएको छ।
गति नियन्त्रण र अनुशासन: तोकिएको गति सीमाभित्र सवारी चलाउन, ओभरट्याकिङ गर्दा अपनाउनुपर्ने सावधानी र लागुपदार्थ सेवन गरी सवारी चलाएमा हुने कानुनी कारबाहीबारे चालकहरूलाई सचेत गराइएको छ।
यात्रु सचेतना: लामो तथा छोटो दूरीका सवारीसाधनमा यात्रा गर्ने यात्रुहरूलाई पनि ट्राफिक नियमको पालना गर्न, क्षमताभन्दा बढी यात्रु नचढ्न र शंकास्पद गतिविधि देखिएमा तुरुन्त प्रहरीलाई खबर गर्न आग्रह गरिएको छ।
पम्प्लेट तथा पर्चा वितरण: दुर्घटनाका जोखिम र बच्ने उपायसहितका जनचेतनामूलक पर्चा पम्प्लेटहरू चालक र यात्रुलाई वितरण गरिएको छ।
प्रहरीको अपिल:
“सुरक्षित यात्रा तपाईंको पहिलो प्राथमिकता हो। हतार नगर्नुहोस्, घरमा तपाईंको परिवार पर्खिरहेको छ।” — जिल्ला प्रहरी कार्यालय तनहुँ।
स्थानीय नागरिक, यातायात व्यवसायी तथा यात्रुहरूले प्रहरीको यस कदमको प्रशंसा गरेका छन्। यस किसिमका नियमित सचेतना कार्यक्रमले चालकहरूको लापरबाहीमा कमि आउने र दुर्घटना न्यूनीकरणमा महत्त्वपूर्ण सहयोग पुग्ने विश्वास लिइएको छ।