देवानगञ्ज घटनामा नेपाल संघीय समाजवादी पार्टीको गम्भीर चिन्ता, निष्पक्ष छानबिन आयोग गठन र दोषीमाथि कडा कारबाहीको माग

रासंसा/काठमाण्डौ, श्रावण १३,

मुलुकमा नेपाल संघीय समाजवादी पार्टीले सुनसरीको देवानगञ्ज गाउँपालिका–३, कप्तानगञ्जमा दुई समुदायबीच भएको हिंसात्मक घटनाप्रति गम्भीर ध्यानाकर्षण भएको जनाएको छ। पार्टीका केन्द्रीय अध्यक्ष तथा पूर्वगृहराज्यमन्त्री मोहम्मद रिजवान अन्सारीद्वारा जारी प्रेस विज्ञप्तिमा घटनामा ज्यान गुमाएका ओमप्रकाश मेहताप्रति श्रद्धाञ्जली अर्पण गर्दै शोकसन्तप्त परिवारप्रति गहिरो समवेदना व्यक्त गरिएको छ। नेपाल संघीय समाजवादी पार्टीले घटनाको वास्तविकता बाहिर ल्याउन उच्चस्तरीय, निष्पक्ष, स्वतन्त्र र विश्वसनीय छानबिन आयोग गठन गर्न सरकारसँग माग गरेको छ। विज्ञप्तिमा घटनामा संलग्न जोसुकै भए पनि कानुनबमोजिम कडा कारबाही गर्नुपर्नेमा जोड दिइएको छ। पार्टीले घटनामा घाइते भएका नागरिक तथा सुरक्षाकर्मीहरूको शीघ्र स्वास्थ्यलाभको कामना गर्दै सरकारले मृतकका परिवारलाई सम्मानजनक क्षतिपूर्ति उपलब्ध गराउनुपर्ने र घाइतेहरूको सम्पूर्ण उपचार निःशुल्क तथा प्रभावकारी रूपमा सुनिश्चित गर्नुपर्ने माग गरेको छ। पार्टीले सत्यतथ्य सार्वजनिक गरेर दोषीलाई कानुनी दायरामा ल्याउनु नै सामाजिक विश्वास कायम गर्ने आधार हुने उल्लेख गरेको छ। विज्ञप्तिमा देवानगञ्जको घटनालाई बहाना बनाएर कोशी प्रदेश, मधेश प्रदेशलगायतका विभिन्न क्षेत्रमा विशेष धार्मिक समुदायलाई लक्षित गर्दै भएका कुटपिट, लुटपाट, आगजनी, धार्मिक स्थलमाथिको आक्रमण तथा सम्पत्तिमा क्षति पुर्‍याउने गतिविधिप्रति गम्भीर चिन्ता व्यक्त गरिएको छ। नेपाल बहुधार्मिक, बहुभाषिक, बहुजातीय तथा बहुसांस्कृतिक विशेषताले सम्पन्न राष्ट्र भएको उल्लेख गर्दै पार्टीले धार्मिक तथा जातीय द्वन्द्वले राष्ट्रिय एकता र सामाजिक सद्भावलाई कमजोर बनाउने चेतावनी दिएको छ। विज्ञप्तिमा कुनै पनि समुदायविरुद्ध घृणा फैलाउने, हिंसा भड्काउने वा सामाजिक सद्भाव बिथोल्ने प्रयास स्वीकार्य नहुने स्पष्ट पारिएको छ। धार्मिक, जातीय र सांस्कृतिक विविधता नेपालको शक्ति भएकाले त्यसलाई कमजोर बनाउने कुनै पनि गतिविधि राष्ट्रहितविपरीत हुने पार्टीको धारणा छ। पार्टीले लोकतान्त्रिक गणतन्त्र, संविधान, कानुनी शासन तथा सामाजिक सद्भावको रक्षा गर्न सबै नेपाली एकताबद्ध हुनुपर्ने आवश्यकता औंल्याएको छ। साथै घटनालाई लिएर अफवाह वा उत्तेजनामा नलाग्न, संयम, धैर्य र विवेक अपनाउन तथा राष्ट्रिय एकता र सामाजिक सद्भावलाई थप सुदृढ बनाउन सबै राजनीतिक दल, नागरिक समाज र आम नागरिकलाई अपिल गरेको छ। नेपाल संघीय समाजवादी पार्टीले सरकारलाई घटनाको निष्पक्ष अनुसन्धान गरी सत्यतथ्य सार्वजनिक गर्न, दोषीलाई कानुनी कारबाहीको दायरामा ल्याउन र पीडितलाई न्याय दिलाउन तत्काल प्रभावकारी कदम चाल्न आग्रह गरेको छ।