सहप्राध्यापक रामभक्त घिमिरेको क्याम्पस जीवन

लेखक-क्याम्पसका सह प्राध्यापक रामभक्त घिमिरे
१. जीवनको स्वर्णिम अध्याय 📜
मेरो जीवनको यो २५ वर्ष ५ महिनाको यात्रा केवल समयको गणना मात्र होइन, संघर्ष, समर्पण, सफलता र आत्मिक सम्बन्धले भरिएको एउटा स्वर्णिम अध्याय हो। नेपाल टेलिभिजन सम्बन्धी स्नातकोत्तर तहको शोधपत्र लेख्ने क्रममा तत्कालीन जीएम दुर्गानाथ शर्मा तथा कर्मचारीहरूसँग नियमित भेटघाट हुँदा मेरो सम्बन्ध निकै निकट बनेको थियो। शोधपत्र लेख्नका लागि मैले प्रस्तावना पत्र लेखेँ र रु ५००० नगद सहयोग तथा सम्पूर्ण स्टेशनरी खर्च व्यवस्थापन गरिएको थियो। त्यसबेलाको त्यो सहयोग अहिलेको एक तोला सुन बराबर थियो। शोधकार्य सम्पन्न भएपछि नेपाल टेलिभिजनमा जागिरको कुरा चलिरहेको बेला यता आदिकवि क्याम्पसबाट पनि जागिरको प्रस्ताव आयो। मानव संसाधन विषयमा मेरो कक्षा अवलोकन भई छनोट भएपछि मैले विभागीय प्रमुखको जिम्मेवारी समेत सम्हाल्ने अवसर सम्म पाएँ। पछि सहायक क्याम्पस प्रमुखको प्रस्ताव आउँदा, “म चाँडै यो कलेज छोड्नेछु” भन्ने भावनाले मैले त्यो प्रस्ताव अस्वीकार गरेँ र नयाँ सोच, नयाँ गन्तव्य र नयाँ उमंगका साथ नयाँ यात्रातर्फ अघि बढ्ने निर्णय लिएँ। 🌟

२. व्यक्तित्व निर्माणको आधार 🏛️
आदिकवि क्याम्पससँग जोडिएको यो यात्रा मेरो व्यक्तित्व निर्माण, नेतृत्व विकास र सामाजिक सेवाको बलियो आधार बनेको छ। जब मैले यो जिम्मेवारी सम्हालेँ, धेरैले भन्नुभएको थियो— “धेरै संघ–संस्थामा संलग्न व्यक्ति भएर पनि आदिकवि क्याम्पसको विभाग सम्हाल्न सक्नुहुन्छ त?” त्यसबेला म उपकार सहकारी, न्यु भिजन पब्लिक एकेडेमी, अकला देवी मन्दिर निर्माण , सामाजिक अभियान, धार्मिक कार्य तथा राजनीतिक नेतृत्वमा सक्रिय थिएँ। तर आज मनदेखि स्वीकार्छु यदि मैले यस कलेजमा जागिर नखाएको भए, सायद यी सबै क्षेत्रमा यति सक्रिय, सक्षम र आत्मविश्वासी भएर अघि बढ्न सक्ने थिइनँ। यस कलेजले मलाई केवल एउटा प्राध्यापक वा विभागीय प्रमुख बनाएको छैन, यसले मलाई नेतृत्व गर्न, समाज बुझ्न, मान्छेहरूलाई जोड्न र परिवर्तनको बाटोमा हिँड्ने साहस दियो। ❤️

३. सफलता र समर्पणको कथा 📈
मैले विश्वासका साथ भनेको थिएँ, “मैले चलाएका सबै संस्था राम्रो छन्, यो संस्थालाई पनि अझ उत्कृष्ट बनाउनेछु।” आज परिणामले त्यो विश्वासलाई सफल सावित गरेको छ। मेरो कार्यकालमा हामीले विद्यार्थी संख्यामा उल्लेखनीय वृद्धि, नतिजामा उत्साहजनक सफलता तथा विभागीय व्यवस्थापनमा सकारात्मक परिवर्तन ल्याउन सफल भयौँ। यो मेरो एक्लो प्रयास कहिल्यै थिएन; यो त सहकर्मी साथीहरू, कर्मचारी, विद्यार्थी र शुभेच्छुकहरूको साझा मिहिनेत, साथ र विश्वासको प्रतिफल हो। 🤝

४. महायज्ञ, दान र छात्रवृत्ति 🪙
क्याम्पसको उन्नति र भौतिक पूर्वाधार निर्माणका लागि दुई पटक आयोजित महायज्ञ मेरा जीवनका अत्यन्त भावुक क्षणहरूमध्ये एक रहे। त्यो समयमा मैले प्रत्यक्ष र अप्रत्यक्ष रूपमा करिब २५–३० लाख रुपैयाँ बराबरको सहयोग जुटाउन सक्ने सौभाग्य पाएँ। मेरो लागि सबैभन्दा गर्वको क्षण त त्यो थियो, जब आफ्ना बाबा–आमाको तुला दानसमेत यही कलेजलाई समर्पण गर्ने अवसर मिल्यो। 💞 यससँगैआफ्ना.हजुरबा–हजुरआमाको नाममा छात्रवृत्ति कोष स्थापना गरी गरिब, जेहेन्दार विद्यार्थीहरूका लागि शिक्षाको ज्योति बाल्न पाएको क्षण मेरो जीवनकै सबैभन्दा पुण्य उपलब्धिमध्ये एक हो।

५. कठिन समय र संस्थाको हित 💪
कलेजले कठिन समय भोगिरहेको बेला १४–१५ महिनासम्म तलब नपाएको अवस्था पनि आयो। त्यो समयमा पनि मैले व्यक्तिगत स्वार्थभन्दा संस्थाको हितलाई प्राथमिकता दिएँ। कलेजले घडेरी बिक्री गर्नुपर्ने अवस्था आउँदा आफ्ना दाजुभाइ, आफन्त र छिमेकीहरूसँग समन्वय गरी घडेरी बिक्री गराई प्राध्यापक तथा कर्मचारीको हितका लागि सक्रिय भूमिका निभाएँ।
६. बिदाइको भावुक क्षण 💐
बिदाइको त्यो भावुक क्षण कहिल्यै भुल्ने छैन। मेरो बिदाइ कार्यक्रममा विद्यार्थीहरू, सहकर्मी साथीहरू, कर्मचारी परिवार, क्याम्पस प्रमुख तथा व्यवस्थापन समितिका अध्यक्ष/उपाध्यक्षज्यूहरूको सम्मानजनक उपस्थितिले मेरो मन अत्यन्तै भावुक बनायो। उहाँहरूले व्यक्त गर्नुभएको माया, सद्भाव, सम्मान र आत्मीय शब्दहरू मेरो जीवनको अमूल्य स्मृति बनेर सधैँ हृदयमा रहनेछन्। तपाईंहरूको माया, विश्वास र शुभेच्छा नै मेरो आगामी यात्राको सबैभन्दा ठूलो प्रेरणा हुनेछ। 🌺

७. आत्मीय क्षमायाचना 🙏
यदि कार्यकालका क्रममा कुनै मतभेद वा विवाद भएका भए, ती सबै संस्थाको हित, प्राध्यापक तथा कर्मचारीहरूको हित र विद्यार्थीहरूको उज्ज्वल भविष्यका लागि मात्र भएका थिए। त्यो कुनै व्यक्तिगत भावना, रिस वा द्वेषको कारण थिएन। मेरो उद्देश्य सधैँ संस्थालाई अझ राम्रो, सशक्त र सम्मानित बनाउने मात्र थियो।

८. नयाँ यात्रातर्फ 🚀
आज म कलेजबाट केवल बिदा भइरहेको छैन, बरु नयाँ सोच, नयाँ गन्तव्य र नयाँ उमंग बोकेर जीवनको अर्को महत्वपूर्ण यात्रातर्फ अघि बढ्दैछु। अब समाज परिवर्तन, प्रेरक वक्ता, प्रशिक्षक, डिजिटल मार्केटिङ, कलात्मक सञ्चार, सार्वजनिक भाषण, नेतृत्व विकास, सामाजिक, धार्मिक तथा राजनीतिक कार्यमा ज्ञान बाँड्ने र सीप सिकाउने कार्यमा दृढताका साथ समाजमा समर्पित हुने हिम्मत बोकेको छु।

९. मेरा शुभचिन्तकहरूका लागि एउटा भरोसा 💼🔥
मैले कलेज छोडेपछि मेरो भविष्यलाई लिएर पिर मान्ने र चिन्ता लिनुहुने मेरा आदरणीय हितैषी तथा शुभचिन्तकहरूलाई म के कुरामा आश्वस्त पार्न चाहन्छु भने मलाई आजको यो सक्षम र आत्मनिर्भर ‘राम भक्त घिमिरे’ बनाउने यही आदिकवि क्याम्पस नै हो। म कलेजबाट बिदा भए पनि मसँग सार्वजनिक भाषण, नेतृत्व विकास, उद्घोषण कला, डिजिटल मार्केटिङ, ग्राफिक डिजाइनिङ र अनलाइन/अफलाइन माध्यमबाट सिपमूलक तालिमहरू प्रदान गर्न सक्ने बलियो सामर्थ्य छ । मलाई राजनीतिक, सामाजिक र धार्मिक कार्यहरूमा सक्रिय रहँदै नयाँ पुस्तालाई सिप सिकाएर अघि बढ्नमा बेग्लै आनन्द ,खुसि मिल्छ। गरिखाने र कमाउने बाटो एउटा मात्र हुँदैन, जीवनमा अनेकौँ ढोकाहरू खुल्छन्। त्यसैले पिर नगर्नुहोला, तपाईँहरूको यो ‘राम भक्त’ दृढताका साथ अगाडि बढ्न पूर्ण रूपमा सक्षम छ र निरन्तर क्रियाशील रहनेछ।

१० . अन्तिम आत्मीय सन्देश 💖
भौतिक रूपमा म यहाँ उपस्थित नरहे पनि मेरो मन, मस्तिष्क, आत्मा र समर्पण सधैँ आदिकवि क्याम्पससँगै रहनेछ। लोकदेखि परलोकसम्म, आत्मा देखि परमात्मा सम्म यस क्याम्पसका सहकर्मी साथीहरू, कर्मचारी र सम्पूर्ण संरचनाप्रति मेरो माया, सम्मान र सहयोग निरन्तर रहिरहनेछ।आदिकवि क्याम्पस सधैँ मेरो हृदयमा, मुटुभित्रै रहनेछ। ❤️

हार्दिक धन्यवाद सम्पूर्ण क्याम्पस परिवारलाई