आइसीसी १९ वर्ष मुनिको विश्वकप क्रिकेटः नेपाल आज पाकिस्तानसँग खेल्दै
रासंसा/काठमाण्डौ, माघ १०,
मुलुकमा आइसीसी १९ वर्ष मुनिको पुरुष विश्वकप क्रिकेट अन्तर्गत नेपालले आज आफ्नो दोस्रो खेल खेल्दैछ। दक्षिण अफ्रिकाको बुफेलो पार्क इस्ट लन्डनमा हुने खेलमा नेपालले पाकिस्तानसँग प्रतिस्पर्धा गर्नेछ। यसअघि आफ्नो पहिलो खेलमा नेपाल न्यूजिल्यान्डसँग पराजित भएको थियो। समूह ‘डि’ मा रहेको नेपाल पहिलो खेलमा न्यूजिल्यान्डसँग ६४ रनले पराजित भएको थियो। नेपाल र पाकिस्तानबीचको खेल नेपाली समय अनुसार दिउँसो १ः४५ बजे सुरु हुनेछ। देव खनालको कप्तानीमा रहेको नेपाल आजको खेलमा जित हात पार्दै प्रतियोगितामा पहिलो जित हासिल गर्न चाहन्छ। गत शुक्रवारबाट सुरु भएको खेलमा नेपालसहित १६ टोलीले सहभागीता जनाउँदै छन्। समूह ‘ए’ मा बङ्गलादेश, भारत, आयरल्यान्ड, अमेरिका रहेका छन् भने समूह ‘बी’ मा इङ्ग्ल्यान्ड, स्कटल्यान्ड, दक्षिण अफ्रिका, वेस्टइन्डिज रहेका छन्। यस्तै समूह ‘सी’ मा अस्ट्रेलिया, नामीबिया, श्रीलङ्का र जिम्बावे छन् भने समूह ‘डी’ मा अफगानिस्तान, नेपाल, न्यूजिल्यान्ड र पाकिस्तान रहेका छन्।