टुँडिखेलमा मनाइयो साकेला उधौली

रासंसा/काठमाण्डौ, पौष २१,

मुलुकमा किरात समुदायले काठमाडौंको टुँडिखेलमा साकेला उधौली मनाएका छन्। किरात राई यायोक्खा काठमाडौंको आयोजनामा सकेला उधौली कार्यक्रमको आयोजना गरिएको हो। कार्यक्रममा संस्कृति तथा पर्यटनमन्त्री सुदन किराँतीले नेपाल बहुसांस्कृतिक, बहुभाषिक फूलवारी रहेकाले यसलाई बचाइराख्नुपर्ने बताए। उनले मुलुकको आर्थिक विकासको मेरुदण्ड पर्यटन भएकाले नेपालीपनको पर्यटन हुनुपर्ने बताए। मन्त्री किराँतीले रैथाने स्वाद र स्वामित्वसहितको पर्यटनको विकास हुनुपर्ने बताए। किरात समुदायमा बैशाख शुक्ल पूर्णिमाको दिन उभौली पर्व र मंसिर शुक्ल पूर्णिमाको दिन उधौली पर्व मनाउने गरिन्छ। पु; १० गते मंसिर शुक्ल पूर्णिमाको दिन उधौली पर्व मनाइएपछि शनिबार भने साकेला उधौली उत्सवको आयोजना गरिएको हो। देशका विभिन्न जिल्लाबाट काठमाडौं आएर बसिरहेका किराती समुदायले साकेला शिली नाच्दै शुभकामना आदान प्रदान गरेका थिए। साकेला पर्वमा परम्परागत वेशभूषामा सजिएर इष्टमित्र भेला भएर गोलो घेरामा ढोल र झ्याम्टा बजाउँदै साकेला नाच नाच्ने गरिन्छ। किरात समुदायले अन्नबाली भित्र्याएको खुसियाली र चिसो बढेसँगै लेकबाट बेसी झर्ने परम्पराको सांकेतिक पर्वका रूपमा उधौली पर्व मनाउने चलन छ। किराती समुदाय, विशेषगरी सुनुवार, राई, लिम्बु र याख्खाहरूले मंसिर पूर्णिमाको दिनदेखि उधौली पर्व मनाउँछन्।