अदालत अघि सारेर आफूलाई हटाइएको अध्यक्ष ओलीको दावी

रासंसा, काठमाडौं, कार्त्तिक २१,

मुलुकमा आइतबार काठमाडौंमा आयोजित कार्यक्रममा अध्यक्ष ओलीले आफू सरकारमा हुँदा पनि अदालत आफ्नै विरुद्ध प्रयोग भयो भन्दै अदालतमार्फत प्रधानमन्त्री चयन गरिएको टिप्पणी गर्नुभयो । उहाँले सत्तारुढ गठबन्धनलाई लोकतन्त्रका भक्षकको संज्ञा दिँदै उनीहरुलाई देश नभइ सत्ता चाहिएको जिकिर गर्नुभयो । नेपाल कम्युनिस्ट पार्टी एमाले अध्यक्ष केपी शर्मा ओलीले अदालत आफूविरुद्ध प्रयोग भएको जिकिर गर्नुभएको छ । उहाँले सेना र प्रहरी प्रयोग गर्न नसकिएपछि अदालत प्रयोग भएको दाबी गर्नुभयो । अध्यक्ष ओलीले ‘सोसल मिडिया वार’ मा सामेल हुनसमेत नेता कार्यकर्तालाई आग्रह गर्नुभयो । उहाँले आफ्ना अभिव्यक्तिको गलत प्रयोग गरेको भन्दै टेलिभिजनको आलोचना गर्नुभयो । आफूहरु नभएको भए २०१७ साल आइसक्थ्यो भन्दै अध्यक्ष ओलीले कसैले गलत कुरा लेख्यो भने त्यसको तल भरमार कमेन्टले धुलो झर्ने गरी सातो लिन कार्यकर्तालाई निर्देशन दिनुभयो । बाबुराम भट्टराई भूमिगत हुँदा पनि उनका छोराछोरी बेलायत कसरी पढेका थिए ? भन्दै उहाँले प्रश्न गर्नु भयो । माओवादी नेताहरू भूमिगत हुँदा युरोप घुमेको अध्यक्ष ओलीको दाबी थियो । उहाँले आफूहरूको प्रहरी रेकर्ड खराब भएको भनेर पासपोर्ट नपाएको बेला विद्रोही नेता भने युरोप घुमेको जिकिर गर्नुभयो । हाम्रो पुलिस रेकर्ड खराब, प्रचण्ड–बाबुरामको पुलिस रेकर्ड खराब थिएन ? अध्यक्ष ओलीको प्रश्न थियो ।