सुदीप गफ्फार नेतृत्वको टोलीद्वारा धादिङ र नुवाकोटका ५ सय बढी परिवारलाई राहत वितरण
अन्जनराज न्यौपाने
गण्डकी प्रदेश
तनहुँ
रसुवा–भोटेकोशी क्षेत्रमा आएको विनाशकारी बाढीबाट प्रभावित भएका धादिङ र नुवाकोटका पाँच सयभन्दा बढी बाढीपीडित परिवारलाई राहत सामग्री वितरण गरिएको छ। सामाजिक अभियान्ता सुदीप गफ्फारको नेतृत्वमा तनहुँको दमौलीबाट गएको विशेष सहयोग टोलीले पीडितहरूकै बस्तीमा पुगेर उक्त राहत वितरण गरेको हो।
स्वेच्छिक सहयोग र जनस्तरको सहकार्य
दमौली क्षेत्रका विभिन्न संघसंस्था, उद्योगी, व्यापारी, युवा तथा स्थानीय शुभेच्छुकहरूको सक्रियतामा खाद्यान्न तथा अत्यावश्यक सामग्री संकलन गरिएको थियो। विपद्को यस कठिन घड़ीमा मानवीय सहायता पुर्याउने उद्देश्यले स्थानीयस्तरबाटै जुटाएको सहयोग सामग्री लिएर गफ्फार नेतृत्वको टोली प्रभावित क्षेत्रतर्फ प्रस्थान गरेको थियो।
प्रभावित क्षेत्रमा राहत वितरण
बाढीका कारण घरबारविहीन बनेका र दैनिक उपभोग्य वस्तुको समेत चरम अभाव झेल्दै आएका परिवारलाई लक्षित गरी राहत वितरण गरिएको हो। टोलीले नुवाकोट र धादिङका बाढी प्रभावित क्षेत्रका अति विपन्न ५ सयभन्दा बढी घरपरिवारलाई प्रत्यक्ष रूपमा भेटेर राहत सामग्री हस्तान्तरण गरेको छ।
वितरण गरिएका सामग्रीहरूमा प्रमुख रूपमा निम्न वस्तुहरू समावेश थिए:
खाद्यान्न सामग्री: चामल, दाल, नुन, खाने तेल र चिउरा लगायतका एक महिनाभन्दा बढी समय पुग्ने खाद्यान्न।
लत्ताकपडा: मौसमी कपडा, न्यानो ब्ल्याङ्केट तथा ओढ्ने-ओछ्याउने सामग्री।
घरायसी सामग्री: पकाउनका लागि आवश्यक भाँडाकुँडा, खानेपानी शुद्धीकरण गर्ने औषधि र दैनिक सरसफाइका सामाग्रीहरू।
पीडितलाई राहत र पुनस्र्थापनाको अपेक्षा
राहत वितरण कार्यक्रमपछि प्रतिक्रिया दिँदै सामाजिक अभियान्ता सुदीप गफ्फारले बाढीले सर्वस्व खोसिएका परिवारको कष्टकर जीवन देखेर आफूहरू सहयोगका लागि तत्पर भएको बताए। उनले भने, “बाढीले धेरै परिवारलाई विस्थापित बनाएको छ र उनीहरूको दैनिक जीवन अत्यन्तै कष्टकर बनेको छ। हामीले उपलब्ध गराएको यो सानो सहयोगले उनीहरूलाई केही हदसम्म राहत पुग्ने विश्वास लिएका छौं।” साथै, उनले आगामी दिनमा पनि विस्थापित परिवारको स्थायी पुनस्र्थापना र दीर्घकालीन सहयोगका लागि राज्यका निकाय तथा अन्य संघसंस्थासँग अपिल गरेका छन्।
स्थानीय बासिन्दा तथा पीडितहरूको प्रतिक्रिया
बाढीबाट सबैथोक गुमाएका स्थानीय बासिन्दाहरूले संकटको समयमा तनहुँको दमौलीबाट आफ्नै घरआँगनमा राहत बोकेर आएको टोलीप्रति आभार व्यक्त गरेका छन्। बाढीका कारण खानेकुरा र बस्ने बाससमेत नभएको बेला प्राप्त भएको यो खाद्यान्न तथा लत्ताकपडाले ठૂलो राहत पुगेको उनीहरूको भनाइ छ।
स्थानीय प्रशासन तथा स्थानीय तहका प्रतिनिधिहरूको समन्वयमा भएको यस राहत वितरण कार्यले पीडित परिवारहरूमा केही मात्रामा भए पनि चराइरहेको घाउमा मलम लगाउने काम भएको भन्दै खुसी व्यक्त गरे सामाजिक अभियन्ता गफारले