युक्रेनलाई पैसा दिँदा दिँदै अमेरिकी जनता थाकिसके – ह्वाइट हाउस

एजेन्सी/फाल्गुण १७,

विश्वमा ह्वाइट हाउसकी प्रवक्ता क्यारोलिन लेभिटले अमेरिकी जनता युक्रेनलाई पैसा दिँदा दिँदै थाकिसकेको बताएकी छिन्। उनले थप भनिन्, ‘परिस्थिति जेलेन्स्कीको पक्षमा छैन, राष्ट्रपति ट्रम्पको पक्षमा छ। ट्रम्पको प्राथमिकता अघिल्लो अमेरिकी प्रशासनभन्दा फरक छ र उनी युद्धको अन्त्य चाहन्छन्। तर जेलेन्स्की अहिले यो चाहन्छन् जस्तो लाग्दैन।’ ह्वाइट हाउस बाहिर पत्रकारहरूसँग कुरा गर्दै लेभिटले भनिन्, ‘उनी (युक्रेनी राष्ट्रपति भ्लोदिमिर जेलेन्स्की) यस युद्धको व्यावहारिक वास्तविकतालाई स्वीकार गर्न अस्वीकार गरिरहेका छन्। यो युद्ध धेरै वर्षदेखि चलिरहेको छ, उनका देशवासीहरू मरिरहेका छन्। र यो युद्धलाई आर्थिक सहयोग गरेर अमेरिकी जनता थाकेका छन्।’ यसअघि शुक्रबार ह्वाइट हाउसको ओभल अफिसमा अमेरिकी राष्ट्रपति डोनाल्ड ट्रम्प र युक्रेनी राष्ट्रपति जेलेन्स्कीबीच भएको भेटघाट चर्को बहसमा परिणत भएको थियो। यस बहसमा विश्वभरका नेताहरूले प्रतिक्रिया दिइरहेका छन्। यस मामिलामा, अमेरिकाको विपक्षी डेमोक्रयाटिक पार्टीका धेरै नेताहरूले पनि राष्ट्रपति ट्रम्प र उपराष्ट्रपति जेडी भान्सलाई ‘दुर्व्यवहार’ गरेको आरोप लगाएका छन्।