कतारी राजाको ‘एसिडी’ सम्मेलनमा सहभागी हुन प्रधानमन्त्री ओलीलाई निमन्त्रणा

रासंसा/काठमाण्डौ, श्रावण २९,

मुलुकमा प्रधानमन्त्री केपी शर्मा ओलीलाई आगामी अक्टोबरमा कतारमा हुने ‘एसियन कोअपरेसन डायलग’ (एसिडी) सम्मेलनमा सहभागी हुन कतारका राजाका तर्फबाट निमन्त्रणा प्राप्त भएको छ। उक्त एसिडी मञ्चमा नेपालससिहत ३५ मुलुक आबद्ध छन्। उक्त मञ्चको १९ औँ मन्त्रीस्तरीय बैठक गत २४ जुन, २०२४ मा इरानमा भएको थियो। नेपाल सन् २०१६ देखि यसको सदस्य भएको हो। प्रधानमन्त्री ओलीसमक्ष नेपालका लागि कतारका राजदूत मिसल मोहम्मद अल अन्सारीले आज (मंगलबार) प्रधानमन्त्री तथा मन्त्रिपरिषद्को कार्यालय, सिंहदरबारमा शिष्टाचार भेट गरी उक्त निमन्त्रणा हस्तान्तरण गरेका हुन्। सो अवसरमा दुई देशका आपसी हित र सम्बन्धबारे छलफल भएको थियो। छलफलमा परराष्ट्र मन्त्रालयका अधिकारीलगायत सहभागी थिए।