चाँगुनारायण नगरको ३३ करोडमा बन्याे भव्य भवन

रासंसा/भक्तपुर, मार्ग २९,

मुलुकमा चाँगुनारायण नगरपालिकाको भव्य कार्यालय भवन तयार भएको छ। झण्डै ३३ करोडको लागतमा उक्त भवन तयार भएको हो। नगरपालिकाले आइतबारदेखि नयाँ भवनबाटै कार्यसम्पादन सहित सेवा सुरु गर्ने जनाएको छ। २१ रोपनी ३ आनाको पर्ति जग्गामा बनाइएको भवन कुल ३२ करोड ७३ लाख सालाखालामा बनाइएको नगरपालिकाले जनाएको छ। जसमा जिल्ला समन्वय समिति भक्तपुरबाट ३ करोड र संघीय सरकारबाट दुई करोड प्राप्त भएको जनाइएको छ। बाँकी खर्च भने नगरपालिका आफैले गरेको हो। नगरपालिकाको वडा नं ५ छालिंग घुमाउने खरिपाटीमा बनाइएको भवन सबै वडाहरुको केन्द्रमा रहेको छ। जसले सबै क्षेत्रका सेवाग्रहीहरुलाई आवतजावत गर्न सहज हुने बताइएको छ। ठूलो क्षेत्रफलमा सानाठूला गरी ६ वटा भवनहरू निर्माण गरिएको छ। मुख्य भवन भने साढे तीन तल्लाको रहेको छ। स-साना भवनहरू क्यान्टिन, विपत्कालीन केन्द्र, नगर प्रहरी क्वाटर र अर्को एक भवन कार्यालयकै प्रयोजनका लागि प्रयोग हुने नगरपालिकाले जनाएको छ। २०७७ फागुन ७ गते शिलान्यास गरिएको भवन साढे दुई वर्षपछि तयार भएको हो। नवनिर्मित कार्यालय भवनको शुक्रबार एक भव्य समारोहबिच नगर प्रमुख जीवन खत्रीले उद्घाटन गरे। चाँगुनारायण नगरपालिका पूर्वाधार विकास शाखाका प्रमुख इन्जिनियर विश्वजीत होनाका अनुसार भवनको प्रत्येक तल्लामा सेमिनार हल रहेको छ। उक्त हलको क्षमता झण्डै दुई सय जनासम्मको रहेको उनले बताए। ‘योसँगै एउटा मुख्य नगरसभा हल पनि रहेको छ’ इन्जिनियर होनाले सुनाए। चाँगुनारायण नगरपालिका वडा नं ५ परिपाटी आर्मी ब्यारेक नजिकैको तीन तल्ले घरको भाडामा रहेको नगरपालिका आइतबार देखि आफ्नै भवनमा सर्नेछ। चार नगरपालिका रहेको भक्तपुरमा आफ्नै भवन बनाउने चाँगुनारायण तेस्रो नगरपालिका हो।